شو أكتر شي بْيطْعَن فيّي، وبنَفْس الوقت بيحَسِّسْني بالعجز الكامل
كأنّو شلَل، شلَل مع بهْدلِة، شلَل مع إهانة، إهانة يعني ذِلّ، يعني شعور
إنّك حيوان متل ما الإنسان بيعاملو وبيعْتِبرو، متل ما ما بيعْتِبرو
الإنسان للحيوان. هاي لحظات بتمنّى تمرق بسرعة خيالية، لكن معظم الأحيان،
بتنقال مرّة عالأخبار وبيِعْلَقو يعيدوها كلّ ساعة، وعا كلّ التلفزيونات
وعلى طول النهار وتاني نهار بالجرايِد. جملة هيّي. شو هيّي؟إنَّ هذه الغارات الوحشية على غزّة مرفوضة!!!!!!!!
وْلَك كيف يعني، شو يعني مرفوضة؟ ومرفوضة مِن بَعد ما صارت!!… فظيعة كيف مرفوضة قال! الطيران بدّو مضادات، أيّا؟ بدّو طيران عا مْقابيلو.. وعالقدس يلّله، وما في غير هيك…
بتَعْرفي؟ مش هاي القعدِة تحت الشجرة الساعة خمسة المسا اللي بتخَلّيني يطلَع معي موسيقى. غريب! أكتر شي بيطلَع معي موسيقى جديدة أنا وعَم إعزف موسيقى معروفة، يعني صايرَة قبل، يعني قديمة… لا الطاولة ولا البيانو وأكيد مش السنديانة… هولي بينَيّموا أحلى نومة بالعالم، أحلى من كلّ تأليفاتي الموسيقية.
ــ ما عندي السيلولير في ساعة… ههه!
ــ آهه، شفتو أنا سيلوليرَك، بعدو عالساعة اللي اشتَرَيتو فيها، ما مْظَبَّطَة عالشرق الأوسط حتّى.
ــ مين قللك؟
ــ (صمت، وبعد الصمت) ليك ما حدا/ ليك، إنتَ ما بيِقْدَر يوصل لعقلاتَك إلاّ السيارات أو الجماعات اللي مزوَّدِة بسلاسل معدنية… روح… الله يقَوّيك.
يا رجُل بيِكْتبو عالكيس أو عالمراطبين، صالحة لغاية: كذا، نهار شهر سنة… من كذا لكذا… تاريخ يعني. شو إنتِ، وإذا اللبنة بلدية، كيف عم بتبيعها؟ طَيّبة عا راسي، أكلِة، بس إنّو كِلّو عندك «صالحة» ونقطتَين وبس؟! إنو شو قصدَك؟ إنو صالحة والرّب راعيها؟… ما تكون هيك؟
(ماشيين بشارع الحمرا… فجأة:)
ــ آه هلّق عرِفت ليه ما عم بيدِقّ الـcellular اللي معي.
ــ طافيه؟
ــ لأ، منّو معي.
ــ إيه عال رواق.
ــ كيف؟ ناسيه بالبيت يعني.
ــ إيه رواق رغم إنو يمكن عم بيدِقّ.
ــ أكيد عم بيدِقّ.
ــ وِيْدِقّ…
زياد الحباني
الأخبار - العدد ٢٤٢٤
الثلاثاء ٢١ تشرين الأول ٢٠١٤
