لا والله فَشَرْلمّا كِنت تحِبّني
وتِسْهَر وتفَصِّللي ألوان القَمَرْ
لمّا كِنت تحِبّني
وتِسْتَرْسِل وتْمَلّي الأوضة وَرْد وشَجَرْ
لمّا كنت تحِبّني
ودايِخْ فيّي وَحْدي مِن كِلّ البَشَرْ
وأنا كنت الأميرَة الكَبيرَة والصَغيرَة
شو اللي عْمِلْتو مبارح
تا واعي مِسْتَغْرِب وما عِندَك خَبَر…
وِجَّك وَلّا القَمَرْ؟
ــ هو: أنا أحياناً بس جرّب أعرف شو بتحِسّي، مش دايماً بعرف.
ــ هي: كيف بدّك دايماً تعرف إذا بس أحياناً عم تجرِّب؟
ــ هو: كيف؟ شو لازم أعمل؟
ــ هي: لازم تضَللك دايماً عم تجرِّب لتعرف أحياناً، وبزيادة هيك.
ــ هو: (يتمشّى قليلاً وقد أُسقِط في يدِه) وإذا بنهاية المطاف، فكّرت أكتر ما هلّق عم فكّر، وعرفتِك عا حقيقتِك وقِمْتي طلعتي ما بتحِسّي بالمرة، أحسَن يعني؟ شو العمل ساعتها؟
ــ هي: ما فيها شي، ساعتها بتقللي.
ــ هو: أنا إبن حلال، اتطَلّعي فيّي هون بعيوني.
ــ هي: عم بتطَلّع.
ــ هو: إي، أنا مش إبن حرام. عم تفهمي؟ يعني مع كل الناس أنا هيك، مش معِك بس. أنا اُعتَبَر إبن حلال بالمجتمع.
ــ هي: واللهِ بعرف، بحِسّ هالشي.
ــ هو: أه! بتحِسّي هالشي؟
ــ هي: إي طبعاً، وَلَوْ!
ــ هو: إي هه! وشو ناطرة؟ إنّو يا تِسلَميلي بدِّك مين يقللك؟ شدّيلي حالك يلله.
ما الفرق بين الغُراب؟
زياد الحباني
الأخبار - العدد ٢٤٢٦
الخميس ٢٣ تشرين الأول ٢٠١٤
){kind=link}